政情：眾志「撤資」 逾千口罩派街
香港眾志（眾志）羅冠聰被法庭裁定喪失議員資格，呢頭發起眾籌冀能保住地區辦事處，但嗰頭眾志秘書長黃之鋒就喺社交網站Facebook（Fb）發貼話眾志清倉，當中包括逾千個口罩可以派街。還記得一批旺角暴亂示威者戴上口罩掟磚，自此有人把口罩視作暴亂物資，今次黃之鋒自爆將逾千個口罩清倉，難免惹人聯想，有網民亦留言「唔搞咁多事啦」。
仲有路由器伸縮直幡棍
黃之鋒喺Fb話，喺整理香港眾志總部期間，發現有唔少多餘嘅物資，希望有需要嘅機構或團體能接收物資，當中除咗有二十七盒衞生口罩，每盒有五十個，總共逾千個口罩，亦有路由器同一百支伸縮直幡棍。
網民叫「唔搞咁多事啦」
近年有唔少本土派喺遊行示威時，都擔心日後被認出而戴上口罩，未知眾志買咁多口罩係咪作好準備？依家唔要送晒出嚟，係咪意味唔再搞抗爭衝擊行動呢？不過，有網民建議佢將呢批口罩送畀院舍，亦都有人指「唔搞咁多事啦」。
黃之鋒喺貼文話今次係大贈送嘅「第一彈」，意味着將陸續有來，唔知下次「撤資」係啲乜嘢呢？