政情：關注一地兩檢組織撐反難辨
廣深港高鐵香港段一地兩檢嘅方案上月出爐隨即惹起爭拗，泛民主派狠批係「割地賣港」，甚至揚言會盡全力反對方案通過，早前更成立「一地兩檢關注組」要求政府叫停方案。事隔唔夠一個禮拜，建制派團體亦都成立「一地兩檢關注聯盟」表達支持，但呢兩個組織嘅名稱只係相差一兩個字，好似鬧雙胞咁，令市民相當混淆，分唔清邊個係反對，邊個係支持陣營。
由逾二十個工商、專業同青年團體組成嘅「一地兩檢關注聯盟」尋日正式成立，目的好明顯係要代表建制陣營抗衡泛民嘅反對聲音。佢哋喺記者會上表明支持一地兩檢方案，仲話會透過舉辦網上宣傳收集社會意見，之後更加會向政府反映添。但更值得留意嘅，係記者會上有唔少富二代現身，當中包括立法會主席梁君彥兒子梁宏正、行政會議成員林健鋒兒子林凱章同菁英會主席莊家彬等人。
反觀上個禮拜，由泛民議員、學者、民間團體同埋學生會代表組成嘅「一地兩檢關注組」，就喺佢哋嘅成立記者會上批評政府閉門造車，將西九龍總站部分地方「割讓」畀內地執行內地法律，斥責做法是違反《基本法》。就尋日有建制團體成立「一地兩檢關注聯盟」，一地兩檢關注組臨時聯絡人、立法會議員陳淑莊就批評對家，話佢哋冇提出新嘅論據嚟支持一地兩檢，又解釋唔到點解個方案符合《基本法》，質疑人哋只係政府嘅「啦啦隊」。
法律界亦組聯席
其實泛民批評一地兩檢嘅時候都去得好盡，將政府提出嘅方案提升去到「割地賣港」、「閉門造車」嘅層次，但就偏偏將組織命名為「一地兩檢關注組」，冇打正旗號叫反對一地兩檢關注組，而建制派既然係支持，亦冇正式叫支持一地兩檢聯盟，兩個組織名稱都好中性，唔通係想留條後路？
呢兩個組織已經令人好混淆，話口未完，今日又有一個關注一地兩檢嘅組織成立，係由「法律人」與法律人士、學者組成，名為「法律界關注一地兩檢聯席」。又多一個關注組織，簡直令人眼花繚亂呀！