中環出更：菁英會旺丁楊華勇11月再添子
菁英會除咗人才輩出，近期仲好似相當旺丁，成員輪流添丁。卓妮早前喺活動上見到已經有兩個小朋友的菁英會榮譽主席楊華勇（Johnny）單拖出席，原來佢太太又再懷孕，更將於十一月再誕一子，所以依家喺家中休息，費事走嚟走去，而副司庫顏麗儀亦有咗五個月身紀，真係可喜可賀！
呢日菁英會舉辦「創新智慧互聯網+」3i青年菁英創業大賽頒獎典禮，菁英會主席莊家彬與一眾元老如創會兼榮譽主席施榮忻及盧金榮等都有出席。莊家彬話三個i代表創新（innovation）、互聯網+（internet plus）及智慧（intelligence），希望有關獎項鼓勵香港年輕人才勇於創新。
顏麗儀未買BB嘢
本身已有一女一仔嘅Johnny話今次太太莊菲娜第三胎將會係仔，可能已經有兩次經驗，所以心情相對輕鬆。佢仲話現時會避免太太周圍走咁頻撲，所以短期內都唔會搭飛機旅行。顏麗儀同老公今次則係第一胎，講起佢哋呢日會展嘅頒獎禮遇正大型BB展，佢哋就話冇趁機落去睇，因為驚太逼喎。
有冇買定一堆BB用品？顏麗儀就笑言乜嘢都未買，亦未收到有朋友送嘅BB用品。佢話過往有啲朋友生BB都會收到好多唔太啱用嘅嘢，結果浪費咗，所以近年佢見唔少朋友嘅做法就係留番BB父母自己買，去探BB父母嘅時候先封利是畀佢哋，當買咗仲實際，又唔使怕買咗啲唔等使嘅嘢吖嘛，聽落都環保啲！
施榮忻同家人就啱啱去完法國巴黎同諾曼第旅行，佢話現時羅浮宮外面，有個類似嘉年華嘅活動，見到自己啲小朋友好簡單就已經可以玩足一日，好易滿足，佢自己都覺得相當開心，嚟緊會趁放暑假再同埋外父、外母一齊去泰國，諗起都好開心呀。
卓妮