係呀，又係港鐵呀，又出事跪低呀，仲要一跪就差不多十一粒鐘，破盡過去紀錄。不過咁，港鐵都知衰嘞，高層急急出嚟耍冧唔在講，仲快速成立調查委員會添，都算係咁喇。
講緊嘅咪就係上周六港鐵觀塘線故障咯，列車要龜速行駛不特止，仲要走走停停，搞到乘客大失預算，高峰期乘客要喺車廂呆等四十五分鐘，都咪話唔誇張。港鐵係就係有安排接駁巴士，之但係提示唔清唔楚，班次又不敷應用，搞到人龍打晒蛇餅，加上月台又焗又悶，有大肚婆仲熱到幾乎暈低添，場面簡直亂過亂世佳人。
港鐵呢一跪殊不簡單，從朝早十一點跪到夜晚九點半，罰金高達二千多萬元，遠超去年全年總和，打破歷次紀錄，都咪話唔醜怪。講番呢單畸士，據悉涉及四個通訊模組失靈，導致一個「固態聯鎖」失控。資深港鐵維修員係咁講嘅，聯鎖系統負責接收軌旁信號，控制道岔及調節列車行駛方向，可以話係信號系統嘅心臟，出事嘅話，最嚴重係撞車，今次算執番身彩嘞。至於事故原因，消息話唔排除同信號系統老化有關，甚至有人違反指引，會唔會再爆大鑊，真係冇人敢寫包單o架。
大家有眼見，今次已經係觀塘線年內第四宗嚴重事故，如果計埋其他路線，更加係十日內第五單。冇錯，年紀大，機器壞，觀塘線已經有近四十年歷史，老化唔出奇，但都唔好壞完又壞吖。呢，今年四月觀塘線先至發生斷纜，五月又輪到架空電纜跳掣，六月打風又話信號故障，家陣又嚟料，都好難頂啫。要知道鐵路係本港交通大動脈，牽一髮而動全身，港鐵郁啲就跪低，郁啲就癱瘓，玩殘乘客不特止，社會成本仲好高添，時間就係金錢吖嘛，就算罰多多錢都補唔番喇。
講句公道話，自從港鐵換咗新主席之後，形象的確有所改善，就連最為人詬病嘅票價問題，今年凍結之餘，加埋優惠仲變相減價添，之不過最基本嘅列車服務如果搞唔掂，點都講唔過去喇。有立法會議員就講得啱嘞，港鐵故障成為常態，罰款當食生菜，相對每年勁賺過百億元，區區罰款根本冇阻嚇力，建議管理層薪金同港鐵表現掛鈎。咁又係呀，系統老化可以更換，管理思維僵化就神仙都難救，最驚港鐵虱多唔怕癢，萬一下次搞到車毀人亡，邊個孭得起先？
嗱，港府身為港鐵最大股東，對港鐵故障頻頻要負起最大責任，特首林鄭月娥咪自認好打得嘅，咪話要打低包括港鐵問題在內嘅三座大山嘅，咁就講多無謂，行動最實際吖。