政情：廉署小組查許仕仁案 影印都要自己做埋
全球矚目嘅前政務司司長「許仕仁案」，係本港首宗以「藉串謀公職人員行為失當」檢控並成功入罪嘅案例，亦係廉政公署喺九七年後處理及審訊時間最長嘅案件，歷時長達八年。原來廉署自○九年接獲「許仕仁案」後，由於涉及人物相當敏感，故執行處最初成立三人小組，由取閱文件、影印至接見證人都係一腳踢。
余振昌形容案件如零碎砌圖
三人小組包括廉署執行處處長（政府部門）余振昌、一名調查人員同總調查主任羅貝雯。余振昌形容案件如零碎嘅砌圖，且只有數塊，有啲仲係好舊嘅，可謂以砌圖方式偵破。羅貝雯坦言調查「許仕仁案」經歷唔少困難，因對象涉及政府前高官同大地產商，牽涉資料非常敏感，須以最嚴謹嘅態度部署，包括取證及會見證人等，基於案件資料敏感性，調查小組初期只有三人，至一二年展開拘捕行動後先增至五人。
另一總調查主任李慧兒係喺一二年接手「許仕仁案」。由於許仕仁案無論控辯雙方全都係「英國隊」，打官司亦各有一套，點樣鋪排案件、搜證過程等，都令佢獲益良多。