政情：補完一鑊又一鑊 羅致光網誌大反擊
勞工及福利局局長羅致光曾擔任社會福利界立法會議員，而且又做過學者，都冇乜邊個夠膽話佢唔熟悉勞福政策，所以佢加入問責班子後就好快上手，但就要忙於補鑊。羅致光上任後除咗要解決上屆政府遺留落嚟嘅取消強積金對沖等爛攤子手尾外，仲要幫副局長徐英偉唔識答最低工資金額嘅瘀事打圓場，尋日佢又寫網誌反擊「綜援養懶人」嘅指控。「勞福」隻鑊爛成咁，真係唔知幾時先補得完。
借徐英偉瘀事食住上
徐英偉啱啱上任做副局長當日，被問到最低工資及三人家庭綜援金嘅金額時都唔識答，淨係話自己只係返咗工幾個鐘頭，被質疑對勞福工作唔了解，可見徐英偉當日唔熟書外，應變亦都唔夠快。好彩羅致光當日在場，即刻幫手解圍，話同樣嘅問題都會考起佢，佢都講唔出成人、長者、兒童綜援嘅標準金額。以羅致光研究勞福議題多年，當佢都話自己講唔出，大家攻擊都冇咁猛烈啦，但到底真係講唔出，定係解救同事而咁樣講，咁就大家自行判斷喇。
雖然羅致光幫徐英偉補咗鑊，但亦畀佢借機會反擊外界對綜援金嘅一啲指控。羅致光尋日喺網誌撰文，借徐英偉事件再次解釋成人、長者、兒童綜援嘅標準金額，而津貼金額係按家庭成員組合同個別成員嘅需要及情況計算，唔同嘅成員組合，津貼都會有唔同。
羅致光又借題發揮，提到網上久唔久就會流傳一篇「四人綜援家庭月入二萬二千元」嘅文章，佢直指冇可能出現，因為領取綜援嘅同時，就唔可以領取其他嘅現金福利。
反駁「綜援養XX」指控
其實羅致光一上任到立法會，就講明唔希望再有議員引用「綜援養『嘟嘟』（懶人）」，令有需要嘅人士卻步唔去申請，其時亦冇議員夠膽反駁佢。佢喺網誌亦有重提「綜援養XX（懶人）」呢句說話嘅影響，佢話，回歸前有政府官員講話「綜援養XX（懶人）」，其後就有人指摘政府咁樣講，佢澄清令呢句說話深入民心嘅唔係政府官員，而係指摘政府嘅人，因為佢哋不知不覺加深綜援嘅負面標籤，嚇跑唔少對綜援真正有需要嘅人。
不過，講到補鑊，最大嗰隻鑊相信係上屆政府仍未解決嘅取消強積金對沖方案，勞資雙方都各持己見，就算羅致光幾高智商都唔容易拆得掂，到底佢有幾多斤両，相信唔使好耐就會見真章。