中環出更：「廿四孝哥哥」郭振華錫到阿妹燶
相信唔少女仔都曾經諗過想有一個好錫自己嘅阿哥，卓妮日前見到香港工業總會主席郭振華（Jimmy），佢就肯定係個錫到阿妹燶嘅一位廿四孝哥哥喇，事關多年前佢曾經將佢部愛車Fairlady借畀阿妹郭美華駕駛，不過阿妹就同佢Total loss咗部車，但Jimmy一啲都冇怪責過佢，仲話最緊要阿妹冇事就得喎，果然兄妹情深。
呢日郭美華出席國際獅子總會中國港澳三○三區區職員暨屬會職員就職典禮活動。阿妹出任第一副總監，身為阿哥嘅Jimmy梗要現身撐佢啦，所以幾忙都抽時間過嚟。Jimmy話佢有兩個妹，三兄妹感情一向要好。講起當年阿妹撞咗佢部車之後第一時間打畀佢同佢講對唔住，佢就侃侃而談一啲都唔嬲，仲笑笑口話阿妹一向「衝得」，而自己就比較保守，不過佢亦唔會因為咁而怕咗唔敢坐阿妹車喎。
林國良外國自駕遊睇風景
懲教署副署長林國良都有出席活動，講起揸車係唔少男士嘅興趣，當年一take過合格考到駕駛執照嘅佢就話香港交通太擠塞，好難揸得快，所以佢都係用嚟代步啫！但喺外國駕駛就唔一樣喇，有時佢都會去自駕遊，好似佢之前就試過喺英國駕駛，沿路欣賞同平時唔一樣的風景，心情都輕鬆啲。不過佢話即使塞車都唔可以掉以輕心，因為塞到瞌眼瞓好易會撞到前車車尾，如果瞌眼瞓就不如搭車算喇，安全至上吖嘛。
講番個活動，新任總監陳立德上場，佢話希望今年將資源投放於服務有視力問題、飢餓、兒科癌症及糖尿病病人同環保工作上，又計劃舉辦籌款活動捐贈流動捐血車畀紅十字會，鼓勵市民多啲捐血。
卓妮