中環出更：帛琉蝙蝠湯高佬賢：幾清甜
夏日炎炎，唔少人都把握機會買張機票去啲島國抖吓暑。立法會議員梁志祥同何俊賢（高佬賢）早前就同漁農界朋友組團去西太平洋嘅島國帛琉，一來去考察，二來當係旅行。高佬賢話，當地居民十分好客，專登整咗一大煲「蝙蝠湯」畀佢哋品嘗，梁志祥一見到即耍手擰頭，但高佬賢就大膽一試，佢話個湯都幾清甜，冇想像中咁難飲喎！
呢趟旅程主要目的係考察當地嘅漁業、養殖業，原本係高佬賢同漁農界人士一齊去，可能行程太吸引，梁志祥知道之後都跟埋去。期間除咗參觀漁船、冷房之外，仲去咗金槍魚工場，了解魚獲由清洗到包裝嘅一條龍作業，順便探討兩地嘅合作機會。
梁志祥後悔冇帶靚相機
梁志祥話，其實用咗一日多啲就已經做完晒啲正經嘢，不過要成個星期先有一班飛機返香港，無理由唔周圍玩吓鬆一鬆，所以大家仲去享受美麗嘅海灘、玩吓浮潛。祥哥話，帛琉嘅水質好清澈，成個海底都係珊瑚，係佢見過最靚嘅浮潛地方，好後悔冇帶部靚相機去喎。
高佬賢亦都話，以前不時同太太去浮潛，但喺帛琉浮潛嘅體驗就特別好。不過佢唔係講緊風景靚，而係當地浮潛嘅導遊喺海底見到垃圾，都會主動幫手執走，唔會視而不見，可見當地民眾真係好愛惜生態環境。高佬賢仲話，今次見到好得意嘅椰子蟹，呢啲蟹會自己爬上樹食椰子，平時真係冇乜機會見到。睇番佢哋放上社交網站嘅靚相，睇嚟真係玩得好盡興。
卓妮