中環出更：山頂補選 趙式浩吳龍飛出戰未敲定
隨着自由黨陳浩濂加入「熱廚房」擔任財經事務及庫務局副局長，其中西區區議會嘅山頂選區議席將需補選。有傳該黨欲派富豪趙世曾兒子趙式浩或前年參戰區選嘅吳龍飛取回議席，惟兩人各有隱憂，暫未敲定由誰出選。至於民主派雖有意挑戰，但據悉曾經贏得該席嘅公民黨陳淑莊因有官司在身，參選機會甚微。
自由黨自二○○○年起至今，大部分時間均手握山頂區議席，僅於○八至一一年因Tanya擊敗競逐連任嘅林文傑而短暫失去，其後由陳浩濂成功復仇搶回，但隨着陳浩濂加入問責團隊，自由黨已明言要搶回議席，但由誰接棒仍未敲定。
據了解，其中一個接棒人選係趙式浩，其優點係出身富貴，容易與山頂選民同聲同氣，但隱憂則係黨內擔心佢態度相對懶散，容易被出名勤奮嘅陳浩濂比下去，或會敗陣。另一人選吳龍飛則相反，出身基層並白手興家，參選過前年區選，有一定實戰經驗，兼且該選區以中產及基層為主，較為適合佢，若轉戰山頂能否打入富貴選民的圈子則成疑。
傳民主黨掛免戰牌
民主派方面，據稱民主黨對山頂議席已掛免戰牌，但有民主派人士坦言陳淑莊再次挑戰嘅機會甚微，原因係佢有佔中官司在身，恐難分身再選，但係強調民主派肯定會派人挑戰，唔會令議席自動當選。陳淑莊回覆查詢時僅話會聽從黨嘅安排。
卓妮