政情：何啟明遊廣州 「上Fb話咁易」
政府早前公布高鐵香港段一地兩檢方案，有政府官員喺記者會上被「挑機」，質問喺內地口岸區嘅候車期間可唔可以用Facebook（Fb）時都答唔到。運輸及房屋局局長陳帆事隔一日先喺電台節目上「補飛」，話使用本地電話卡亦可以喺內地登入唔同網站，呼籲大家唔使擔心。立法會議員何啟明尋口就親自試過陳帆所建議嘅方法，仲上載佢喺廣州品嘗細蓉嘅相片到社交網站，證明陳帆所言屬實。
展開夏日美食之旅
何啟明尋日喺福田乘坐高鐵到廣州展開夏日美食之旅，又喺Fb上載咗一張自己喺廣州品嘗細蓉嘅相片，又指「學帆哥話齋，上Fb話咁易！」佢話今次特登喺Fb打卡，係要證明使用本地電話卡即可喺內地登入唔同網站，坦言「陳帆講嗰啲冇錯（口架）！」只係有部分人較少返內地先會有咁嘅憂慮。佢仲話自己不時都會去廣州，一直都有使用本地計月費嘅電話卡，所以登入唔同網站都冇問題。
見到佢張打卡相，除咗有細蓉之外，仲見到大大碗花生，有網民留言話佢歎餸，亦有網民叫佢唔好食咁多花生，唔通驚佢做花生友？