政情:袁莎妮推動商校交流助學生擴眼界

香港雖然機會處處,但周圍嘅競爭都好激烈,搞到啲家長要出盡辦法,要小朋友上至天文、下至地理都要無一不曉,希望令佢哋贏在起跑線。但香港總商會總裁袁莎妮(Shirley)似乎唔係咁諗,佢早前幫手推動一個商校交流計劃,等高中生可以了解多啲職場上嘅選擇,為將來做好準備。

認識職場運作 及早準備

Shirley尋日喺Facebook上載咗一張同高中生嘅合照,話同學完成咗中學文憑試之後,好快就要邁進人生另一階段,無論係唔係繼續升學都要做好準備,喺不久嘅將來就要進入職場。佢之前亦都有幫手推動一個商校交流計劃,等同學可以了解一下現實世界中,銀行、零售等行業到底係點樣運作,從而準備自己將來嘅去向。

其實世界轉變得咁快,Shirley都話求學唔可以只係求分數,最好就係擴闊吓眼界,學習多啲唔同類型嘅技能。講到近年開始有年輕人開始做企業家,嘗試向開創新嘅科技企業,佢就期望將來可以多啲企業幫手推廣交流計劃,等年輕人可以有更多機會了解真實世界係點運作喎。

第一手消息請下載on.cc東網iPhone/iPad/Android/Windows Phone Apps