政情：波哥狠抗拉布 梁君彥冇晒計
受泛民主派全方位「拉布」嘅影響下，立法會嘅議事同審批撥款嘅速度被拖延。財務委員會主席陳健波（波哥）為咗通過多項涉及民生嘅撥款，喺本立法年度最後一次會議出手剪布，之後更提出修改會議程序抗拉布。立法會主席梁君彥尋日向民主派議員開火，炮轟佢哋挾持民生議題，當正呢啲係「政治人質」喎。梁君彥要借財委會嘅情況向泛民隔空開火，唔通佢對泛民喺大會拉布真係束手無策，無計可施？
梁君彥尋日喺一個電台節目上批評，有部分議員為咗表達對政府嘅不滿，用盡一切方法拖延議會正常運作，令部分新措施同撥款建議唔能夠如期落實，搞到連市民都要批評立法會係議員演戲嘅舞台。
批泛民用民生議題做「政治人質」
鬧鬧吓，佢就講到財委會早前審議嘅教育新資源撥款，同埋用作建設三間醫院嘅工務工程撥款，都因為議員拖延審議程序，最終要財委會休會前最後一刻先通過得到，借此批評有民主派議員挾持呢啲冇爭議性、涉及民生嘅撥款作為「政治人質」，阻礙香港經濟發展，甚至削弱香港競爭力，令香港社會甚至連下一代都要付上好大代價，希望議員未來能包容唔同意見嘅聲音，肩負起監察政府嘅責任。
除咗財委會，立法會大會亦係拉布重災區，其實梁君彥已經陰啲陰啲去剪布，例如預算案辯論限時等，但感覺上唔及波哥咁「快狠準」。波哥早前更出招，大刀闊斧抗拉布，建議要修改財委會嘅議事程序，建議唔再容許議員提出「休會待續」議案，並刪減縮短表決鐘時間嘅辯論環節。呢啲建議只要獲得財委會過半數在席議員支持，就可以修改議事程序。
不過，梁君彥想有樣學樣修改大會嘅議事程序並唔容易，先要過議事規則委員會嗰關，委員會內已經拗餐死，要過關都唔易，就算委員會拗掂數將建議交上大會，屆時亦要進行分組點票。再講，波哥抗拉布嘅建議，泛民揚言唔排除提一百九十萬個修訂招呼佢，若果喺大會傾修訂議事規則嘅話，泛民提出嘅修訂肯定唔止呢個數，分分鐘又搞到流會。
喺咁嘅形勢下，大會要修改議事程序真係難上加難。可能佢見到波哥有望脫苦海，再諗番起自己往後嘅日子，仲要受拉布嘅折磨，所以先發炮吐口烏氣呢？