政情：將院飯堂訪客止步 何民傑大呻要跟進
通常病人食開醫院餐，趁病情好轉時都想轉吓口味，幫襯醫院餐廳滿足一下，或者病人家屬亦都隨時要喺醫院餐廳解決食飯問題。不過最近將軍澳醫院餐廳改變一貫做法，只售賣食物予醫院職員，病人同訪客免問。西貢區議員何民傑（Raymond）早前就被拒於門外，直言要跟進喎！
指不近人情 忽略需要
Raymond嘅外母早前因病入住將軍澳醫院，由於佢未到探病時間已經到達，就打算去餐廳食住等，點知發現餐廳近期收緊營運方式，只售賣食物予醫院職員。佢大呻餐廳做法不近人情，對病人同家屬造成不便，亦忽略咗佢哋嘅需要。
Raymond之後就喺區議會作出跟進，但由於餐廳牌照規定只能出售食物予醫院員工，所以問題仍然未能解決。不過佢話其他醫院餐廳無類似限制，而且都有折衷嘅做法，例如限制開放公眾時間或劃定指定餐桌，總之唔會咁不近人情囉！