政情：黃錦星行書展唔Buy一帶一路？
尋日係書展最後一日，環境局局長黃錦星（星星）亦有入場參觀書展，更喺青協攤位買咗三本書。之前幾位局長都買咗有關一帶一路嘅書，但星星就好唔同，買咗其他書，仲話其中一本書都係「一」字開頭，但就唔係一帶一路，而係《一脈山城》。
星星尋日中午去到書展，先同一班青年分享閱讀樂趣同互動訪談，提起自細喜歡郊遊行山，童年時望住座山溫書成績都好啲，又指香港郊野公園靚又近，推介年輕人遊覽荔枝窩，可以了解有幾百年歷史嘅客家村咁話。跟住佢又話自己讀建築出身，所有同生活相關嘅書籍都會睇。其後就喺青協攤位用咗一百七十八蚊買咗三本書，包括《慢遊小店》同《香港旅俠－北區背包行》，支持本地文化。
教學生用咖啡渣驅蚊
之後佢又去咗環境局嘅攤位同小朋友對談，當然唔少得叫小朋友唔好做大嘥鬼，又同學生分享多種環保手作用途，例如點樣可以用作驅蚊嘅咖啡渣等。