中環出更：鍾國斌訪以國 坐外交部專車
以色列本月初有阿拉伯槍手喺耶路撒冷殺死兩名警察，隨後以色列當局喺清真寺入口處加裝金屬探測器，引起巴勒斯坦人同回教國家極度不滿。喺當地局勢迅速升溫之際，正喺以色列訪問嘅香港立法會代表團亦感受到緊張氣氛，成員之一嘅鍾國斌（Felix）亦透露代表團專車係由以色列外交部安排，更似係防彈添！
Fb放相 證當地保安嚴密
立法會代表團自本周日起展開訪問，正值當地以巴局勢緊張，人身安全頓成行程考慮之一。代表團尋日喺以國首都特拉維夫短暫停留，Felix亦趁機喺Facebook上載咗幾幅照片，相中見到以色列街上有佩槍嘅人士，亦有身穿制服嘅女警踩住電動三輪車喺街道巡邏，反映當地保安嚴密。
之不過，最令代表團成員安心嘅，相信係由以國外交部安排嘅專車莫屬。Felix認為嗰架黑色多人車嘅車款，似係特種武器同戰術隊（SWAT）款式，仲覺得係防彈嘅添！不過，Felix亦怕自己「烏鴉嘴」，笑言「無人想證實係咪bullet proof（防彈）」，似乎仍然對人身安全有憂慮。
卓妮