中環出更：羅舜然改名羅梓菡為咗避大病
仁愛堂今年四十周年，除咗以「植根四十‧以愛立仁」為目標外，主席李愛平今年仲出盡法寶湊齊四十個董事局成員，比之前多出十幾個，當中梗係不乏重量級人物，好似「胸圍大王」羅傑倫女兒羅舜然（Denise）咁，不過望真啲，咦！點解個牌唔同名？唔通卓妮認錯人？原來係Denise改咗新名叫做羅梓菡。
話說Denise已經唔係第一次改名，原來佢喺○八年嗰陣仲改過另一個名叫羅彥琳，用咗九年幾咁耐，直到舊年有個風水師話佢可能會有大病，於是就幫佢改過另一個名，就係佢呢日個牌寫住嘅羅梓菡喇！佢笑言父母同朋友都唔知佢改過中文名，一嚟冇刻意提起，二嚟啲朋友平時都係叫佢英文名，所以都未必知喎。
李愛平謙稱自己畫畫麻麻
呢晚仁愛堂舉辦四十周年慈善晚會，李愛平帶埋成班董事局成員齊齊出動，拍賣多件珍品，好似國學大師饒宗頤嘅字畫等，為仁愛堂興建新服務大樓及長遠發展籌募善款。曾跟嶺南畫派大師趙少昂學過繪畫嘅李愛平仲話其中一幅拍賣品、已故著名畫家丁雄泉嘅名作《執扇仕女》係佢心頭好，但講到畫畫佢就好謙咁話畫得唔好，亦冇學書法，所以只能欣賞。
當晚現場非常熱鬧，除咗好多董事局成員攜眷出席外，仲有好多前主席現身撐場，好似前主席莊舜而、蔡黃玲玲、陳鄭玉而同史顏景蓮等。講起改名，副主席羅台秦就話最緊要健康，其他嘢都唔會強求，仲透露當年阿女出世都冇特登搵師傅幫佢改名嘅，不過就知道老公戴澤良有拎阿女出世時辰八字畀師傅睇過， 唔知係咪因為咁所以戴澤良錫到個女燶喎。
卓妮