政情:鄉議局訪歐行程多 林偉強殘晒

鄉議局早前組團訪問荷蘭同英國,短短八日旅程就有十多項活動,難怪擔任訪歐團團長嘅鄉議局副主席林偉強都大呻冇時間,仲話自己返港後個樣殘晒添!

仲去咗倫敦北部放煙花

林偉強話,今次行程相當緊密,先後拜訪過多個宗親會及同鄉會,亦出席咗唔少晚宴,最特別係去倫敦北部一個球場上放煙花,當晚仲筵開八十席,真係聽落都覺得熱鬧。佢話今次訪歐並非新鮮事,事關鄉議局每年都有訪問團,今次出訪聽到唔少海外鄉僑意見,佢就直言相當有意義喇!

李耀斌喺英國玩多4日

訪歐團副團長李耀斌就訪問行程完咗之後,喺英國留多四日,由倫敦玩到去蘇格蘭。原來佢家姐喺英國定居,佢幾年先去一次英國,所以今次要善用機會,趁機去探吓一班親友咁話。

第一手消息請下載on.cc東網iPhone/iPad/Android/Windows Phone Apps