中環出更：孔憲榮爆響口 「飯敍集團」曝光

憶兒時用公仔麵換魚翅

講起行業辛酸史，孔憲榮笑言細個覺得「有咩辛苦得過讀書」，加上家人做嫁女餅生意，輾轉就做燒雞扒。佢認為做飲食好彩同信譽好緊要，仲要有朋友互相照應，記得以前幫爸爸手時，曾以一碗公仔麵同隔籬酒樓員工換一碗魚翅，記憶深刻。

張宇人話最初冇諗過出書，但阿仔張士宗建議既然有咁多飲食界古仔，點解唔出本書，記錄本地人飲食文化點滴，所以就出咗呢個系列嘅書喇，張宇人仲特登着番本書封面套衫出席添！

潘權輝（左）同莊任明（右）分享多年工作滿足感。

陳岳成（左）及陳子富（右）堅持香港製造。

陳子富凌晨起身整豆腐

今次本書訪問唔少本地薑老字號，間間歷史十年以上，好似家族做咗五十年牛丸嘅大埔振興董事陳岳成同幾代夾埋過百年嘅荳品老店珍香園老細陳子富。陳子富話最開心後生一代讀飽書都肯返嚟繼承家業，因為真係好辛苦，每日凌晨十二點就要起身預備整豆腐。唔知佢個仔使唔使好似藤原拓海咁送豆腐？至於陳岳成就話返屋企幫手主要因為有種承擔嘅責任感，及對食物品質嘅追求。

蛋撻王行政總裁莊任明則指做咁多年滿足感最大係衝出國際，而三代做海味嘅安記董事總經理潘權輝就指經歷金融海嘯最難捱，入晒啲貨驚賣唔出，幾晚冇瞓過覺，最後的起心肝蝕賣，點知反應好好，賣晒不特止，仲要補貨添。依家學識寓工作於娛樂，公餘時間支持小朋友學踢波。

卓妮