光棍佬教仔，便宜莫貪。暑假啱啱開始，同學仔搵暑期工，千萬謹記呢句口訣，否則「貪字得個貧」事小，誤墮法網身陷囹圄事大，絕對唔係講玩o架！
咪以為又係老生常談，好多所謂「筍工」，表面睇好似冇乜嘢，實際上陷阱處處，年輕人盲舂舂踩隻腳埋去，分分鐘衰咗都唔知咩事。呢嗱，海關數字顯示，今年上半年因售賣侵權物品而被捕嘅人士當中，三成係學生，年紀最細嘅只有十三歲，甚至試過有內地大學生及本地女護士學生因此被判囚及判感化令添。
唔知係咪啲年輕人見每年年宵賣嗰啲精品，當中好多同知名品牌「似曾相識」，以為冇乜所謂，加上喺售賣時標明「真假自辨」、「Not Real」、「高仿」等，以為咁做就戴咗頭盔；又或者喺網上市集或社交網站刊登廣告，等買家落單後至去買冒牌貨轉手賺取差價，諗住萬無一失，但結果都一樣斷正收場。
話時話，暑期工陷阱千變萬化，防不勝防，網上賣冒牌貨只係其中冰山一角。近排發生多宗案件，犯罪集團以「免費旅遊」為餌，氹青少年「落疊」成為「衝關豬」。不法分子最慣常手法係聲稱包食宿、機票，再提供幾千至幾萬蚊酬勞，而帶貨嘅最熱門路線則包括由巴西等南美國家，飛經中東再經東南亞國家返香港。最近就有三位年輕人涉嫌運毒喺泰國被捕。舊年超過三十名港人因參與跨境販毒被捕，當中四人係十五至十九歲青少年，情況都咪話唔嚴重。暑假係旅遊旺季，同類個案恐怕陸續有來。
嗱，害人之心不可有，防人之心不可無，出埋錢請你遊埠，當中肯定有蠱惑。可惜吖，有啲年輕人因為少不更事，輕易被人利用；亦有部分人貪刺激好玩，「成功」後四處同朋友炫耀；另一啲則可能出於僥倖心態，聽信謠言以為違禁品收埋喺木雕裏面可以避開X光機，又或者賴係「手信」或「不知情」就可以hea過調查人員，等到出事後悔已經太遲，特別係東南亞國家，運毒好多都係殺頭死罪，博唔過o架！
當然喇，橋唔怕舊最緊要受，好似「年滿十八歲毋須經驗」、月入萬八嘅「物流工」，又或者「識手機打字就有收入」一類「筍工」，經常會以唔同面目出現，年輕人一定要打醒十二分精神。
始終都係呢句，保護年輕人免墮求職陷阱，全社會必須通力合作，海關同警方等部門固然要加強掃蕩，學校及家長亦要加強宣傳教育，時時留心，而我哋作為傳媒嘅，就梗係會keep住對年輕人溫馨提示喇！