港式奶茶伴隨香港人逾百年，每個人心目中嘅完美奶茶當然各有不同。九十幾歲嘅「中國變形金剛之父」林亮，日前首次獲邀做奶茶比賽評判，佢笑稱自己雖然唔係專家，但話晒都飲咗七十幾年奶茶，做評判梗係冇難度喇！講起心中嗰杯完美奶茶，佢鍾意加咗煉奶嘅奶茶，貪佢夠香滑，其次就係要夠熱。當日佢連飲六杯，好彩每杯都只係淺嘗即止，唔係就飲到飽晒嘞！
