中環出更：答問大會睇手機 林正財：一心多用
早前新特首出席立法會答問大會，但去撐場嘅新任行政會議成員、安老事務委員會主席林正財被發現猛咁低頭睇手機。林正財尋日喺電台節目中幫自己解畫，話呢個係佢嘅特色，可以「一心多用」，強調有留心聆聽答問大會嘅內容喎。
識多啲年輕人 令政策「貼地」
林正財喺節目中被問及被傳媒影到佢喺旁聽答問大會時忙於用手機，佢直指呢個係佢嘅特色，佢確實可以喺同一時間做幾樣嘢嘅，而且係有聽到答問大會嘅內容，而喺會後仲傳短訊畀特首，讚揚特首開頭都開得唔錯添！話時話，當日佢一坐入會議廳公眾席就開始睇手機，到議員問完晒問題先停手，係咪有聽到答問大會嘅內容，真係得佢自己先知。
被問到行會成員嘅平均年齡較高，會唔會唔能夠回應年輕人嘅訴求，令政策「離地」，佢就話最重要係認識多啲年輕朋友，從中學習，令自己心境更年輕，政策更「貼地」。
對於安老服務嘅問題，佢認為係因為社區照顧服務做得不足所致，若過渡性社區照顧服務做得好，會有助長者居家安老。佢又話安老事務委員會花三年時間草擬長者院舍住宿照顧服務券計劃，提出以長者券改善牌照院舍嘅服務，以提升質素。
卓妮