中環出更：史佩加遊泰伏虎 演美女與野獸
唔少名人尋日都去咗沙田馬場，趁今季抖暑前最後一日賽事入場趁熱鬧。卓妮見到香港馬主協會會長史立德及太太史顏景蓮同埋個女史佩加，阿女話今個暑假唔去旅行住，因為等九月生日先去泰國，仲騷咗啲佢之前喺泰國布吉「與虎同眠」嘅相，名副其實係美女與野獸！
見史佩加皮膚白滑，估唔到原來佢好鍾意玩水上活動同食辣嘢，又鍾意睇動物，所以去東南亞旅行就啱晒佢心水。佢話好鍾意泰國，早前喺當地同老虎近距離接觸，影咗好多相，見佢成個身挨喺隻大老虎身上表情依然從容不迫，就知佢真係好鍾意動物。佢話動物園嘅員工提佢記得唔好同老虎有眼神交流，但老虎就不時會望佢，佢仲有餵老虎BB，相當大膽。
盧金榮全家赴日變「牛魔王」
至於菁英會前主席盧金榮，過去忙足兩年，早前落莊後即刻同囡囡及太太去日本大阪玩番轉。佢話兩個女本身唔太鍾意食肉，但唔知點解特別鍾意日式燒肉同涮涮鍋，一家去到日本即刻變「牛魔王」，又笑言本身諗住帶兩個囡囡去京都着和服影吓相，但兩個女就冇興趣，可能覺得件衫麻煩喎。
轉頭又見到香港中華廠商聯合會常務會董陳國民、東華三院執行總監蘇祐安同太太。蘇祐安話慈善團體都有暑假放，佢哋平時一年有四百幾個活動咁多，中間都要放番兩個禮拜假抖抖氣嘅，佢就已經同太太諗好去英國探個女，阿仔都會一齊去，順便成家去奧脫福球場「朝聖」，皆因佢哋一家都係曼聯迷，雖然遇唔啱時間睇波，但睇吓個球場都興奮。
卓妮