政情：陳美齡批港教育制度製造失敗者
香港中學文憑考試啱啱放榜，又有數以萬計中學畢業生被拒於大學門外。早前一度傳出係教育局局長人選嘅前歌手陳美齡（Agnes），接受電台訪問時直言十分反對現有公開試形式，指現時只得一萬六千幾人可入讀大學，更多人淪為「失敗者」，強調教育唔應該製造失敗者，而係讓年輕人做想做嘅事。佢仲話若不實行教育教革，將來只剩下單面向嘅孩子，會好快遭時代淘汰。
冀政府大力改革中學教育
雖然Agnes加入政府嘅消息係假，但佢關心教育就真。佢仲話冀政府大力改革本地中學教育，好似外國咁，為中學生度身訂造課程，以完成學分為畢業標準，不應製造只係識考試嘅學生。
Agnes擁有美國史丹福大學教育博士學歷，但原來佢細個讀書成績唔理想，只以唱歌作為人生目標，結果父親出絕招，要求佢交出超過八十分嘅平均分，以學業換夢想，佢最終發憤讀書，會考有三優四良，父母都覺得驚喜。所以佢鼓勵學生唔好低估自己能力，亦勸勉家長唔好否定孩子嘅夢想喎！