中環出更：蔡若蓮拒回應做副局傳聞
盛傳會出任教育局副局長嘅教育工作者聯會副主席蔡若蓮，喺任命副局消息傳出後尋日首次現身，對於教育界有逾一萬人聯署反對佢出任副局，佢兩次拒絕評論後，便以趕時間為由離開。
稱趕下場活動 急步離去
舊年喺立法會教育界功能界別選舉中落敗嘅蔡若蓮，被指係下任任教育局副局長嘅熱門人選，惟消息甫出即惹起爭議，其中教育界發動聯署反對蔡若蓮任副局長，至今已有逾一萬人簽名。被問及有反對佢出任副局長嘅聲音時，首度公開現身嘅蔡若蓮話：「唔準備去評論關於我嘅討論」，佢其後又指「知道大家好關心」，但仍無意就事件回應。之後工作人員以趕下一場活動為由，安排蔡若蓮急步離去。
究竟蔡若蓮會唔會做教育局局長楊潤雄嘅副手？睇嚟仲係未知之數，但若果蔡若蓮出任副局長就變成咗劉江華翻版，事關當年劉江華喺俗稱立法會超級區議會選舉落敗後，未幾即出任政制及內地事務局副局長，其後更「升呢」出任民政事務局局長，更順利過渡到新政府。
卓妮