中環出更：立會搞酒會新舊議員聚首
立法會秘書處尋日喺立法會會議廳前廳舉行現任議員與前任議員雞尾酒會，唔少前議員都有出席，包括香港回歸前立法局年代嘅議員張有興、林貝聿嘉等。佢哋卸任咁耐，都仍然咁熱衷出席立法會嘅聯誼活動，料必對立法會有一份感情。不過金融界前立法會議員吳亮星（星爺）就別有一番感受，佢話在任四年以嚟立法會都冇乜效率，覺得浪費公帑同對唔住公眾，卸任後去中學同年輕人分享經濟同金融知識，反而有意思好多喎。
星爺最近應教育中心邀請，間中會去中學同年輕人分享。佢話以前做議員時，立法會「冇乜進度」，覺得浪費公帑，不過如果立法會有需要搵佢開講座，佢都樂意幫手喎。
黃宜弘同單仲偕飲到面紅紅
前議員單仲偕、李華明、黃宜弘及鄧家彪等人都有「回巢」，一向嗜酒嘅黃宜弘同往年一樣，自帶茅台酒同一眾新舊議員暢飲，仲話好驚冇酒飲喎！卓妮見佢同單仲偕都飲到面紅紅，黃宜弘聲言飲咗廿三杯，離開時要秘書處職員攙扶。至於剛做完眼部手術嘅單仲偕就飲咗五杯。黃宜弘兩年前曾患肺癌，單仲偕都啱啱做完眼手術，兩人都仲咁貪杯，真係搵命博。
轉頭見議員謝偉俊（Paul）、邵家輝同張有興傾得好開心。Paul嘅衣着一向都幾潮，卓妮發現佢着住一對鴛鴦波鞋，左腳係黑色，右腳係黃色，喺一眾西裝筆挺嘅男議員之中，特別顯眼。呢排潮流興「freestyle」，唔通呢個就係佢嘅freestyle？
卓妮