政情：最少缺席投票議員 陳振英排榜首
立法會會期接近尾聲，除咗議員喺大會嘅出席率受注目外，議員嘅投票出席率都引起關注，民主派成日批評建制派功能組別議員唔開會、唔投票，但投票出席率嘅結果就令人大跌眼鏡，最少缺席投票嘅議員竟然係金融界陳振英，第二係保險界陳健波，第三就係進出口界黃定光（象哥），估唔到成日瞓覺嘅象哥都可以贏一眾民主派，打入三甲。
民主派缺席率達43%
有網站計咗過去一年議員嘅立法會大會、財委會同內委會嘅投票紀錄，結果發現五百次嘅投票中，撇除主席梁君彥，缺席最多次數嘅三個議員都係來自民主派功能組別，依次係會計界梁繼昌、法律界郭榮鏗同衞生服務界李國麟。而民主派嘅整體投票缺席率係百分之四十三，較建制派百分之二十二高出一半。
至於最少缺席投票嘅議員就分別係陳振英、陳健波同象哥，人民力量陳志全（慢必）同工聯會何啟明並列第四，頭十個最少缺席投票嘅議員中就只有慢必一個民主派入榜。
梁繼昌接受查詢時就解釋，自己無投到有關預算案嘅百幾條修正案，認為係「瑣碎無聊」，又話自己就修正案冇取態。事實上，呢百幾條修正案係民主派用嚟拉布嘅伎倆，點知就令民主派議員投票率咁低，都真係害人終害己喇！
