政情：王敏剛難忘內地食羊眼
食生果都要講時令，夏天係唔少生果當造嘅時候，尋日就有一個介紹廣西杧果嘅活動。出席活動嘅香港中華總商會永遠榮譽會長王敏剛就話，咁多生果中佢最鍾意食杧果，而以前返內地做生意佢都鍾意品嘗唔同地方嘅生果。不過食生果就易，佢話最難忘係要食羊眼同羊血腸，真係唔係個個夠膽。
王敏剛話生果有分寒涼或燥熱，食用時要留意身體狀況，杧果對改善胃酸過多有幫助。佢又話︰「一方水土一方特色」，以前返內地工作時鍾意試當地特色生果，但最難忘都係早期喺西部做生意，當地人招待佢時拎咗啲羊眼、羊血腸出嚟，因為知道佢哋招待上賓先會出動呢啲嘢，所以佢都唔好意思拒絕，惟有合埋眼吞咗佢。
陳振彬分享食水果心得
同場仲有新界社團聯會理事長陳勇同觀塘區議會主席陳振彬。陳振彬就話有啲人怕杧果食得多會燥熱，其實只要唔好切開破壞纖維就冇問題，不過拎住成個杧果剝皮食嘅話食相唔係咁好，都係屋企先可以咁做。佢又分享咗食其他水果嘅心得，話荔枝切走底部先食就唔怕燥熱，香蕉去籽就會滑啲，龍眼雪凍就又清又甜喇。點解佢咁識食？佢就話因為自己為食喎。