政情：亂提調動議程 一舊雲畀主席鬧
立法會大會尋日三讀通過《道歉法》，正當主席梁君彥想宣布二讀審理樓市加辣招草案嘅時候，民主黨（白鴿黨）議員黃碧雲（一舊雲）想亂咁嚟，要求大會先審理水務設施修訂規例等嘅附屬法例，點知仲畀主席鬧爆如果個個都係咁，根本就開唔成會，一舊雲即刻衰咗。
要求先審理附屬法例
尋日係呢個立法年度最後一次大會，但有民主派議員就不停點人數，搞到啲議程塞晒車，根本就冇可能完成所有議程。本身靠鉛水事件成名嘅一舊雲就擔心自己攞唔到彩，趁加辣招草案審議之前舉手，話個議案可能十幾個鐘，搞到夜晚八點都未傾完，要求主席調動議程，先審理埋啲附屬法例喎。
之不過，立法會嘅議程一早就已經訂好晒，點可以畀佢亂咁嚟！主席梁君彥就即刻鬧爆佢，話議事規則已經寫清楚要審議完法案，先可以審議附屬法例，仲話如果每個議員以為佢嗰條議案係緊要啲，咁主席就要處理嘅話，根本就安排唔到會議。