政情：鄺俊宇考6次 尹兆堅得1分 公開試失手非末日

尹兆堅前日喺Facebook鼓勵應屆DSE考生，自爆佢首次考舊學制嘅中五會考僅得一分。佢話因為中學時貪玩，喜歡踢足球同打桌球，又因家貧而喺會考前夕都要去餐廳打工，結果報考七科，只得中文科合格，佢話失敗一次並非世界末日，佢翌年重考，即成功升讀預科；雖然之後高級程度會考（AL）成績仍不足以升讀大學，但係亦憑着唔放棄嘅精神，喺公餘時間考取入讀大學嘅資格，輾轉成為社工。

陳健波勸勉學生可放眼專業資格

相比起尹兆堅，鄺俊宇嘅會考戰績更「悽慘」，佢由二○○○年起，先後考咗六次會考，只為英文科合格；其中一年更曾因考試途中手機響起，成績遭降級，可謂屢敗屢戰嘅經典例子。

建制派方面，保險界議員陳健波亦讀書唔叻，佢當年升讀大學失敗後，即投身銀行工作。佢話若果冇大學學位，應退而考取專業資格，又話自己喺當年半工讀下，嘗試應考會計專業資格卻失敗，轉而考比較有興趣嘅保險試，最終花咗六年時間終成功，勸勉學生在主流學制外，可放眼各專業資格。

工業界議員吳永嘉同醫學界議員陳沛然可算係立法會優才生。講起今屆出爐嘅六名狀元，全部都話想讀醫科，盛傳會考應考科目全部火箭（A）嘅吳永嘉，成績足以入讀醫科，家人亦希望佢成為醫生，但佢自問怕血，又想到律師同醫生都係救助他人嘅職業，最終決定「興趣行先」，選咗讀法律。佢又勉勵高材生，唔好因為「好成績」限制自己嘅選擇，個人性格同興趣對選修科目亦好重要。

讀到醫科都未必一帆風順，陳沛然讀醫首次考試出咗成績後，即與另外九名同學被校方召見，原來佢哋呢十個人嘅成績包尾，故被校方「照肺」。佢話中、小學一直係校內尖子，讀醫後頓變「包尾大幡」打擊好大，而當年呢十個人當中有七個最終受唔住壓力而離開，而佢直言係「頂硬上」，先成功堅持到畢業。