中環出更：梁耀忠立會議辦爆手足口病

兩職員中招 已大規模消毒

阿忠話佢嘅辦事處本周初有職員感染手足口病，已經即時知會立法會保安同事，並安排身穿制服嘅清潔人員到辦事處消毒。但其後又再有職員染病，立法會隨即安排更大型嘅清潔工作，除咗要消毒佢嘅辦事處外，更將消毒工作延展至樓層嘅走廊範圍。

佢話早前曾安排部分同事改到葵芳地區辦事處工作，部分同事尋日先恢復到立法會工作。現時有關同事已休假隔離，並按照醫生指示休息最少七日，相信情況已經受控。佢又話自己平時都有做運動，希望鼓勵同事要多做運動同埋留意身體狀況，仲話若果「夜瞓」，身體弱咗就好易染病喎。

另外，立法會秘書處亦回覆指出，已派員到有關議員辦事處進行清潔同消毒工作，並喺有關議辦所屬樓層嘅公眾地方，包括會議室同茶水間等進行消毒同清潔。

卓妮