中環出更:點評女士內衣 林大輝:重主題多過美感

香港理工大學(理大)紡織及製衣學系日前喺香港時裝節春夏系列中舉行第四屆內衣時裝展,卓妮都有去睇,仲見到理工大學校董會副主席林大輝、立法會教育界議員葉建源同紡織及製衣界議員鍾國斌。見佢哋一路睇有講有笑似乎幾開心,唔知佢哋對女士內衣有乜嘢評價呢?林大輝即笑笑口話,行外人睇同佢哋行內人睇係唔一樣o架喎!

當年喺理工學院(理大前身)紡織工藝學出身嘅林大輝話,睇時裝騷同內衣騷一樣,行內人同行外人觀點好唔同,通常行外人會概括睇件衫靚唔靚或者有冇美感,但佢哋行內人就比較留意作品係咪真係表達到個主題咁話。

葉建源用學術角度去睇

而葉建源睇內衣都可以用學術角度嚟睇,一啲都唔尷尬,佢話今次唔係第一次欣賞,而佢喺理大有唔少老友,所以一定要嚟撐吓場,好似紡織及製衣學系益德內衣專業學院教授余詠文等,仲覺得學到好多嘢添,佢得知原來香港喺全球內衣出口佔好大比重,接近一半,而今次佢就好欣賞一個有和式元素的系列喇!

達利國際創辦人林富華嘅長子林知譽都有到場,佢話將會贊助來年嘅理大內衣時裝展,又認為香港好多設計人才,但未必個個能夠同市場接軌,結果做咗其他行業,相當可惜,所以嚟緊佢哋就會觀察理大學生設計過程,畀啲意見佢哋,希望可以幫助發掘人才。

做開製衣嘅佢亦不時現身唔同地方時裝騷,笑言去開歐洲仲會順便掃埋貨,事關歐洲啲皮鞋款式多又靚,價錢仲便宜過香港三成,好抵買,佢呢日着住嘅灰紫色皮鞋就係買嚟襯番今季興嘅藍色西裝,仲話染色對對都唔一樣o架!

卓妮

第一手消息請下載on.cc東網iPhone/iPad/Android/Windows Phone Apps