醫療事故一宗都嫌多，早前聯合醫院開漏藥導致鄧桂思急性肝衰竭嘅個案，至今無人問責。

醫學界立法會議員陳沛然（Pierre）終於忍唔住於個人網誌爆seed，指出近來醫院管理局經常出現問題，醫管局高層必須負責，要求年薪高達逾五百萬元嘅醫管局行政總裁梁栢賢減薪、甚至辭職。

Pierre喺網誌上列舉醫管局管理上出現嘅嚴重問題，包括公營醫院醫療事故處理機制出現漏報；藥物管理及藥物名冊都出現嚴重問題；急症室嘅非急症爆滿、非急症新症門診輪候時間長；醫管局喺資源、人事及服務管理上都透明度不足、山頭主義，而且仲不斷自製公關災難等。

Pierre仲翻查醫管局向立法會提交嘅年報，發現人工最高嘅就係剛獲續約嘅梁栢賢，年薪達五百七十四萬元，較上年度增加四十五萬元。Pierre認為，梁栢賢作為醫管局行政總裁，必須為醫管局出現連串管理問題負責，最低限度係減薪或辭職。面對Pierre嘅步步進逼，梁栢賢真係要度橋妥善回應，否則肯定難以全身而退。