政情:蔡若蓮未任命已中箭 藍黃鬥打民意戰

新一屆政府銳意要改善行政立法關係,包括上任不足一周時間就提出涉及四十多億教育新資源建議,初步建制、泛民陣營都反應正面,不過咪以為咁就可以順利過關,事關被指有濃厚建制背景的教育工作者聯會副主席蔡若蓮,盛傳會出任教育局副局長,泛民已開始發動蔡若蓮「未任命、就難產」一事,至今已有逾一萬人聯署反對蔡任副局;另一邊廂,議會外嘅建制派亦開始動員策動支持蔡若蓮任副局嘅民意,至今有約四千人聯署撐蔡若蓮係副局合適人選。其實近年建制、泛民被網民標籤為藍絲及黃絲,今次「藍黃之爭」民意戰會否擦槍走火,意外波及教育新資源撥款,時間就會證明一切。

政圈廣泛流傳,去年立法會教育界選舉中落敗嘅蔡若蓮,將可能「敗部復活」出任教育局副局長,成為新任教育局局長楊潤雄嘅左右手。雖然楊潤雄等高官對於蔡若蓮會否走入官場不置可否,泛民已對此如拾至寶,鎖定反對蔡若蓮做官係反對新政府嘅首場大戰。

事實上,一場正反團體民意戰嘅火藥味已進一步蔓延,廿六名民主派議員早前已出招反對政府委任蔡若蓮為副局,當時資深議員涂謹申仲形容,政府委任蔡若蓮嘅嚴重程度,與重推《基本法》第二十三條立法一樣,會令泛民同新政府得來唔易嘅關係破裂。

教育界萬人聯署反蔡做副局

與此同時,教育界亦發起聯署反對蔡若蓮,至今已有逾一萬人簽名聯署反對蔡若蓮做副局長。聯署發起人饒戈認為,蔡若蓮曾於選舉中低票落選,反映得唔到教育界支持,而且欠缺制訂及落實政策嘅經驗。饒戈續批評,蔡若蓮背景「深紅」,恐成國民教育嘅最新「推手」,重申蔡不適合出任副局長。

正所謂「一隻手掌拍唔響」,泛民將反對程度升溫,建制陣營亦開始反擊,香港政研會主席鄧德成主動向傳媒發出新聞稿,稱上月開始發起網上聯署支持蔡若蓮任副局長,至今有約四千人參與,佢認為蔡若蓮有完整嘅履歷及教育熱誠,係出任副局長嘅不二之選。

其實政府最終會否委任蔡若蓮任副局長,依家十畫都未有一撇,但各方依家已視作既定嘅事實,正反團體鬥聯署打民意戰,在不斷升溫及火上加油嘅情況下,更多嘅出招及反擊場面只會發生,最終新政府「吹和風」會否被撲熄,要視乎新政府嘅政治研判及最新取態嘞!

第一手消息請下載on.cc東網iPhone/iPad/Android/Windows Phone Apps