政情：種番薯傷皮膚鍾樹根做facial急救
立法會前議員鍾樹根舊年卸下議會工作，但生活仍然相當充實！佢早前更到海南「搞生意」，轉行做農民種日本番薯，可能耕田嘅工作太辛苦，樹根尋日喺Facebook訴苦，話自己日曬雨淋，要去美顏「做facial」急救，事後更有網民提醒佢作為樹根一定要吸收水分喎。
話自己美顏之後青春廿年
本報早前報道過樹根轉行種番薯，佢尋日就喺fb訴說做農民嘅苦況，仲話自己平時要日曬雨淋「最傷就係啲皮膚」，佢仲上載咗幾張自己包住保鮮紙「做facial」急救嘅相片，笑稱自己美顏過後已經「回復青春、後生廿年、皮膚靚番晒」。
畀網民笑「事前事後無分別」
但係，有網民睇到相片之後就笑佢「事前事後好似無分別」、「可能聰明人先睇到」，更加有人問佢係唔係參加咗長者優惠活動，亦有網民提醒佢「樹根一定要吸收水分」。
甚至有網民話：「根叔即時回到三十歲喎」，樹根眼見網民咁畀面，佢就回應話：「你雖然善良，但有點誇張，我喜歡」。
