中環出更：建制想搵埋專家 煮死鄭松泰？
負責調查立法會議員鄭松泰倒插五星旗同區旗嘅委員會已展開工作，委員會主席梁美芬話已應鄭松泰要求唔公開研訊，改為以閉門方式處理，而尋日亦傳召咗五名唔同政治光譜嘅證人作供，過程非常順利，仲話委員會考慮緊搵啲《國旗法》嘅專家畀意見添！搵專家，建制派係咪想加大火力煮死鄭松泰呢？
希望年底可完成調查報告
梁美芬話因為案件有司法程序進行當中，所以有一批證人要之後先可以嚟調查委員會作供，委員會之後會進行資料搜查、研究相關法律、案例同議事規則等，下次將喺十月初開會，希望年底可完成調查報告。佢又話考慮就《國旗法》喺香港嘅適用問題邀請專家證人去委員會畀意見，仲話香港亦有相關案例可作參考。調查委員會成員全部嚟自建制派，邀相關專家畀意見同參考案例，擺明係唔會輕易放過鄭松泰喇！
鄭松泰回覆話選擇唔公開研訊，係因為事件已進入司法程序，按常理根本唔適宜同時安排公開聆訊，佢亦早已講明唔會出席委員會嘅研訊，至今態度無變。佢又話已對調查委員會做法失去信心，事關見到之前調查UGL事件嘅專委會咁樣做嘢法，已令佢覺得閉門同公開根本無分別。
卓妮