中環出更：馬時亨搞歡送宴 六前局長合唱《陪着你走》

立法會議員田北辰喺社交網站上載影片，可見有份合唱嘅包括食物及衞生局前局長高永文、公務員事務局前局長張雲正、政制及內地事務局前局長譚志源、商務及經濟發展局前局長蘇錦樑、財經事務及庫務局前局長陳家強，以及運輸及房屋局前局長張炳良，至於現任商務及經濟發展局局長邱騰華雖然冇一齊合唱，但亦有喺台下支持。

譚志源有老婆獻花兼獻吻

影片所見蘇錦樑獨唱頭一小段，其後六人一齊合唱，成日表演唱歌嘅蘇錦樑同譚志源唱得最大聲，亦最投入，而張炳良就表現得較為拘謹，個咪離開超遠，直情唔係好聽到佢把聲，唔通怕走音被人聽到？唱歌期間，先有人獻花畀張炳良，譚志源即刻問點解張炳良有花，然後有人就獻花畀高永文，譚志源又立即指「最靚仔嗰兩個有花o架喎」，隨即陸續有人獻花畀其他前局長，譚志源太太仲獻花同獻吻畀老公，大晒恩愛。

六名前局長合唱，以蘇錦樑（右三）同譚志源（右四）唱得最大聲。	前高官葉澍堃（左）同太太都有出席歡送晚宴。	（左起）梁君彥、盧偉國、陳健波等合唱《輪流轉》。（互聯網圖片）

多位政商界名人都在席，立法會主席梁君彥、財委會主席陳健波同工務小組委員會主席盧偉國等亦合唱《輪流轉》回贈多名前局長。田北辰話新政府又係新一次輪流轉喎。另外，多名前高官包括前經濟發展及勞工局局長葉澍堃、保安局前局長李少光等都有出席，主人家馬時亨亦曾擔任商務及經濟發展局局長，佢仲化身攝影師拍攝添！

卓妮