香港在殖民地時期，教育政策被嘲諷為「填鴨式」教育，而香港公務員不少精英及現時之管治班子，好多都係填鴨式教育教出嚟嘅，可見填鴨式教育未必失敗；反之，如今教育政策朝令夕改，搞到學生、老師、家長都無所適從。
教育問題千頭萬緒，老朽也是在填鴨式教育下長大，習慣抄寫背誦，因而打下文字基礎，只是自小疏懶，考試成績不如人，活該考不上正規大學，為謀生考個準教師證，如此便誤人子弟三十年，罪過。早前有家長到曾參與ＢＣＡ（即改良版ＴＳＡ）試行計劃的一間學校示威，又掛「罷考ＢＣＡ」標語，又焚燒ＴＳＡ試卷，老朽曾指呢位家長「做多咗」，真係出於善意，其實考乜都好，何必搞到咁大陣仗？
當今之世，想入好學校就要有應試能力，你考試冇咁叻，考唔上心儀大學，那只能怪自己。老朽早前看了一篇文章，說魯迅之所以棄醫從文，並不一定是要「吶喊」，震醒中國人麻木不仁的神經，而是要細究史實，並發現魯迅讀醫的成績一般，全班一百四十二人，他排第六十八位。魯迅也許有自知之明，知道自己不是讀醫的材料，改讀文科，搵啱出路，終成為一代文壇宗師和思想巨人。
所以話，讀唔讀到書，好大程度要睇自己嘅天分同應試能力，考唔到一流大學，退而求其次囉；再唔掂，求一技之長，說不定因此闖出一片天，社會上亦不乏此類例子。科舉制度是中國文明的一項傑出創造，否則不可能在中國持續千年而不衰，內地每年之高考，你睇啲一線中學如何操練學生應考，就知考試始終係選拔人才嘅最好方法，啲家長亦明白，在沒有更好的制度下，兒女要有出頭天，就係要通過高考，考上清華、北大等重點大學，就一天都光晒！事實上，世界上一流嘅人才，多通過考試競爭才脫穎而出，考個ＢＣＡ啫，何必咁大反應？