政情：公文袋 眾志籌款吸金插水

埋單計數之下，舊年吸金力跑贏大市嘅香港眾志，籌款數字較舊年下跌，僅獲四十三萬二千元，向來係吸金指標嘅黃之鋒、羅冠聰同周庭等人似乎光芒不再；就連公文袋籌款數字亦都插水，僅籌得二十六萬元。其他政黨亦出現輕微下跌，好似小麗民主教室就籌到十九萬元，較舊年少一萬元，人民力量就籌到十五萬元，較舊年少四萬元。

稱遊行人數跌 否認光環減

點解吸金力插水？公文袋黨魁楊岳橋解釋，籌款數字多寡相信同遊行人數有關，人多捐款就會多，反之亦然，佢又話遊行時無人向佢表示不滿同反感，唔會認為係光環減褪。雖則咁講，但佢話會以數字作為警惕，有則改之，無則加勉。

雖然公文袋、眾志嘅吸金力下跌，但亦都有政團成功掠水。好似社民連就籌得五十萬八千元，較舊年多近九萬元，而為支援因佔中被檢控人士而成立嘅「守護公義基金」（基金），首次參與籌款就獲五十四萬元捐款，加上早前承諾將捐款轉贈基金嘅民主黨（白鴿黨）同工黨，兩黨分別籌十七萬三千元同十二萬八千元，而朱凱廸新西團隊亦把籌得嘅逾十萬元轉畀基金，即基金應有逾九十萬元嘅進帳，但距離佢哋五百萬元嘅目標籌款額就差好遠嘞！

泛民搞基金 支援捱告議員

今年新設街站籌款嘅仲有「專業議政」，總共有十九萬元進帳，但佢哋並唔係將款項轉畀基金，而係另設一個「核心價值基金」掠水，分別支援「專業議政」三個議員，包括被前特首梁振英控告誹謗嘅梁繼昌、因為參與佔中而被檢控嘅邵家臻同埋被司法覆核議員資格嘅姚松炎。

泛民成日偷偷成立基金，要市民為佢哋嘅違法行為埋單找數，真係令人髮指！