中環出更：黃偉綸做鍵盤戰士 發千五字網誌
家陣潮流興「KOL（Key Opinion Leader）（關鍵意見領袖）」，唔少人都會開個網誌發表意見，近年班政府高官都唔例外。新政府班子啱啱上場，勞工及福利局局長羅致光同發展局局長黃偉綸，都效法前任局長，變身「鍵盤戰士」寫吓網誌。黃偉綸篇網誌仲寫咗成千五字，而羅致光都有八百幾字。首篇網誌就咁鬼長氣，似足兩個局嘅前任局長、即現任政務司司長張建宗同財政司司長陳茂波。
陳茂波做緊發展局局長時已經好鍾意寫網誌，直到依家幾乎係「每周一篇」，但佢啲網誌吓吓都逾千字，鬼咁長氣。現任局長黃偉綸亦都「有樣學樣」，千五字嘅網誌幾乎全篇都係講自己嘅工作近況，包括發展局推展緊嘅「活化翠屏河計劃」同「起動九龍東辦事處」嘅計劃。
羅致光保留平台玩新風格
相比之下，另一個「首發」局長羅致光嗰篇就少咗近半字數。張建宗喺「升呢」前亦係密密寫網誌，篇篇都係「字海」，繼任嘅蕭偉強亦有繼續寫，但就唔見有字海。羅致光喺網誌講明會保留網誌平台，但同時預告會有唔同風格。「唔同風格」係咪講緊唔會學兩位前任咁「密密寫」？
卓妮