中環出更：食大紅袍雪糕 吳永嘉忍唔到口
香港中華廠商聯合會（廠商會）早前舉辦北京工展會，一班廠商會會董成員都有去打點兼撐場。卓妮日前喺立法會議員吳永嘉嘅Facebook（Fb）見到佢同時任商務及經濟發展局局長蘇錦樑有張食緊雪糕嘅為食相，表情都幾誇張o架！
吳永嘉話雪糕係佢哋會員兼國家認可高級評茶師王詩雅（Celia）特登由香港帶過去嘅，連一向唔食甜嘢嘅佢見到係大紅袍味，都大讚相當吸引，忍唔住食番一杯，因為只係少少甜，但就有非常濃郁嘅大紅袍香味，但就話食完之後兩日要跑耐啲步喎。
王詩雅特地從港帶上京
忙裏偷閒，班會董仲去咗廠商會永遠名譽會長楊孫西喺北京嘅酒店食飯。Celia話當日晚宴以「茅台×大紅袍」為主題，全個茶宴由頭盤到甜品都同茶有關，好似大紅袍茶熏三黃雞、龍井茶香桂花球同茉莉花茶脆皮蝦等，聽到已令人垂涎三尺。而佢自己除咗同屋企做開茶葉生意，仲有做埋茶味甜品，今次襯晒個茶宴主題，所以就決定帶埋自家雪糕上京，一帶就帶咗成一百個大紅袍味雪糕咁多，用乾冰同冰袋裝住搭咗四個幾鐘飛機過去o架！
永遠名譽會長施榮懷（Irons）都喺Fb上載咗有關今次行程嘅相，Irons話佢哋去咗幾日北京，行程緊湊，除咗喺北京全國農業展覽館舉辦北京工展會外，有朋友仲約咗佢去睇中超聯賽，北京國安對江蘇蘇寧，因為佢個朋友做球場廣告包商管理，笑言結果佢哋睇咗十分鐘波，傾咗八十分鐘偈。卓妮考佢有冇留意賽果，佢都仲噏得出係○比○打和嘅。
卓妮