中環出更：七一前夕 漢奸黎又密會三老鴿攪局
七一前夕，牛鬼蛇神全面現身，其中壹傳媒黎智英（漢奸黎）又密會攪局，今次嘅座上客係民主黨（白鴿黨）三名老鴿兼前立法會議員，包括「AV仁」何俊仁、人稱「高達」嘅李永達及單仲偕，歷時超過兩個小時，認真耐人尋味；另一邊廂，末代港督彭定康又再「回魂」，繼續對香港事務「指指點點」，於接受外國傳媒訪問時再次批評北京侵犯香港嘅自由同自治，真係陰魂不散，有佢講無人講嘞！
尋晚約六點四十五分，漢奸黎名下嘅七人車接載AV仁、高達及單仲偕三人，到其位於何文田嘅寓所，當時高達就坐喺司機旁邊嘅位置，另外其他兩人就坐喺後座。
AV仁高達單仲偕現身
及至九時零五分，AV仁等三人齊齊乘坐同一部七人車離開，其中高達及單仲偕於旺角落車，最後落車嘅係AV仁，佢直接落車返回天后寓所。適逢七一前夕，加上新班子於七一宣誓就任，漢奸黎等人此時此刻密會，莫非又想度橋攪局？
壹傳媒股價再創新低
漢奸黎密會攪局嘅同時，佢創辦嘅壹傳媒計劃對旗下《蘋果日報》及台灣《蘋果日報》等刊物，推行「假自僱、真裁員」方案，遭到各界人士猛烈炮轟，就在此時，壹傳媒業績差亦遭券商看淡，股價繼周二跌近百分之三後，昨日續瀉，一度低見零點三零五元，最多曾跌逾百分之六，收市報零點三一五元，仍跌逾百分之三，再創歷史新低。資料顯示，壹傳媒由一一年至今，七個財政年度累積虧蝕十四點八八億元，早前公布截至今年三月底止的全年業績，則勁蝕三點九三億元。
彭定康陰魂不散廢噏
另一邊廂，末代港督彭定康再次出動對香港事務「指指點點」，佢前日接受英國報章訪問，再批評北京侵犯香港嘅自由及自治，並稱英國因為要同中國做生意，竟然喺呢啲議題上對北京卑躬屈膝。佢又稱英國脫歐之後似乎更依賴同中國嘅貿易關係，佢呼籲美國同歐洲其他國家關注香港嘅情況，真係陰魂不散。
卓妮