政情：今日你上鏡：開會冇時間 何啟明視像當落區

唔少身兼區議員嘅立法會議員都因為成日要開會，搞到冇乜時間落區，所以都要諗諗計。雙料議員何啟明話自己同其他黨友最近就開始試一個新方法，就係喺地區辦事處度放置平板電腦，佢就可以喺立法會打視像電話，接下地區個案嘞！佢話好多時街坊都係想見吓自己個樣，但係立法會好多會議都行唔開，惟有偷啲時間試吓咁樣見街坊得唔得啦，佢仲試過用呢個方法，幫街坊網購添，認真誇張。睇番何啟明仲要貼咗部平板電腦喺雪櫃上面，睇嚟佢嘅辦事處都冇乜位喎。