政情：為滿足學生實習機會 青聯郭永亮好頭痕
暑假又係學生實習嘅季節，坊間唔少機構都會提供實習嘅機會。香港青年聯會（青聯）近年都有為學生提供內地多個城市嘅實習，而七月將會履新做青聯主席嘅郭永亮（Andy）就透露，舊年嘅實習中，都有件事搞到好頭痕。
電視台變電台 學生唔制
Andy話舊年有位學生原本獲安排到內地一間電視台實習，但該電視台喺正式實習時，就未能安排電視台嘅職位，改為安排該學生到電台實習，但亦會有部分視頻，即學生亦有出鏡機會，該名學生獲知安排後，覺得不能接受，要求青聯及實習機構出道歉信畀佢，不過青聯其後同佢傾過，該名學生最後都冇堅持要求收道歉信。
佢又話初初都冇預計學生對實習崗位咁執着，佢哋亦吸取經驗，今年同報名嘅學生都會解釋清楚，做好期望管理，實習崗位要由機構安排，若機構未能安排原定嘅崗位，亦轉為安排相關崗位，希望報名嘅學生事前就清楚明白。