政情：跑步出汗醫感冒？陳沛然籲勿信偏方
雨季又到，淋雨加上氣溫一凍一熱真係好容易病。本身係醫生嘅立法會議員陳沛然早前出席無家者世界盃籌款賽時話，聽過病人講唔少治療感冒嘅偏方，最近就聽過有病人同佢講，初發感冒應該去跑步出身汗，佢提醒咁樣唔會醫好感冒架，發高燒千祈唔好跑呀！
食維他命C治病「冇乜分別」
陳沛然都係波牛，每個禮拜都會踢下波，前日佢喺無家者世界盃籌款賽落場踢波。喺賽事結束後，同佢講起醫治感冒嘅問題，佢話無論係跑步出一身汗、焗一身汗出嚟、食多啲維他命C，頂多可以紓緩下，但係同醫好感冒嘅主要原因無關，吸收多啲維他命C同食多啲生果幾時都係好事，但對於醫病純粹係「好過冇，冇乜分別」。
佢解釋，正常人一年有兩、三次感冒，喉嚨有少少唔舒服都已經算一次o架喇，每個人每次發病時間都唔同，有啲三、五日，有啲就兩星期，之後就會自己好番，至於新聞報道中有時睇到嘅感冒菌上腦、入心，其實幾百萬人都未必有一個o架！