笑看天下:動輒搞人 禮崩樂壞

香港社會愈來愈反智,也愈來愈政治化,一個小三基本能力評估(BCA)都搞到七國咁亂。鬼咩!人稱「吳得掂」嘅教育局局長吳克儉,冇心教育卻醉心環遊世界,五年任期外訪逾五十次,使咗三百幾萬元公帑,離港超過一百五十日,佢考察咗啲乜、對教育政策有乜幫助,相信冇乜人知,而在任期間佢對香港教育有乜貢獻,叫你是是但但噏一樣,恐怕難過解答數學難題「龐加萊猜想」。

BCA是小三全港性系統評估(TSA)的改良版,教育局早前話BCA研究數據有助學校回饋學與教,資料不會用作評量學校的指標,故學校毋須額外操練。教育局既然用咗咁多公帑去改良TSA,如果出嚟講解嘅係有志於教育嘅教育局局長,而唔係大部分人以為嘅「旅遊局局長」,推行起嚟,相信會冇咁棘手。可惜弱勢局長萬事哀,而基於「民無信不立」的箴言,改良後的BCA依然有不少人反對。

不少反對派政客為了吸睛,也不理BCA是否真的有改良,一味在立法會內叫囂,完全不知議事論事為何物。其實,既然BCA啱啱推出,又何必立即一棍打死?而作為校長、老師、家長,應該理性啲,起碼看看出來的成效如何再作定論吧?

早前在立法會BCA公聽會抗議的補習教師王曦彥和家長伍嘉儀,日前到曾參與BCA試行計劃的一間學校示威,在門外掛上「罷考BCA」標語及焚燒TSA試卷,搞到校長要報警。香港號稱「民主」社會,而民主的精神是「我不認同你的說法,但我誓死捍衞你說話的權利」,佢哋嘅行為無疑係「做多咗」,你唔畀自己嘅仔女考冇問題,但何必到人哋學校鬧事呢?自佔領行動之後,香港社會禮崩樂壞,好似漢奸黎咁,郁吓就話要「搞人」,多咗啲咁嘅流氓惡棍,香港難有寧靜歲月,更遑論進步。