政情：公民講場：有靚地唔識起屋 張炳良Hea爆回應

香港公屋輪候時間愈來愈長，僧多粥少，政府成日都將覓地建屋困難掛喺口邊。東方報業集團就踢爆喺大埔富善邨旁一幅佔地六公頃，估計可以興建多幢公屋大廈、提供四千多個住宅單位嘅靚地，竟然閒置咗最少二十年，真係大嘥。運輸及房屋局局長張炳良尋日被追問政府係咪覓地不力時，就回應話政府對於可以做住宅用嘅地都盡量用嚟做住宅，塊地空置咗可能係有其他用途，所以未能攞出嚟，又話喺搵地方面，發展局都係盡力去做喎！咁究竟大埔呢幅地點解閒置咁耐？又點解唔可以作發展公屋用呢？張炳良冇認真交代，以為咁樣就可以釋除公眾疑慮？