政情：蘇錦樑搬走傢俬等收工

政府仲有兩星期先至換屆，但有人似乎已經急不及待想收工。商務及經濟發展局局長蘇錦樑（Greg蘇）尋日下午喺社交網站上載一張空蕩蕩嘅辦公室照片，留言話：「我的傢俬已經從辦公室搬走了，這是離開政府工作崗位的第一階段！」Greg蘇咁快就收拾包袱棚尾拉箱趕着離開，睇嚟佢對政府工作都唔係太留戀。

Greg蘇上載呢張相之後，引來唔少人留言。其中有人質疑佢就算卸任，物資都應該留畀下一手。Greg蘇就澄清只係搬走自己帶來嘅傢俬。

臨別依依嘅仲有一眾政治助理，教育局政助施俊輝以及民政事務局政助徐英偉分別喺社交網站上載政助聚餐嘅大合照，除咗財經事務及庫務局政助趙必立因為不在港而冇現身之外，幾乎全部齊晒。連為咗幫前財政司司長曾俊華助選而辭職嘅財政司政助羅永聰都有出席聚餐。

眾人齊學韓風用手指做出心心嘅手勢，盛傳喺下一屆政府將升任勞工及福利局副局長嘅徐英偉，就拎住個酒樽扮飲勝，睇嚟好開心。