政情：建制班長失魂 投錯票有驚無險
立法會去年十月換屆，由代表中華總商會嘅商界立法會議員廖長江(Martin)擔任建制派「班長」一職，喺過去幾個月嚟總算風平浪靜，不過尋日就泛起小漣漪。話說尋日立法會財務委員會審議港鐵沙中線鐵路工程嘅追加撥款，Martin竟然投票反對有關撥款。其實Martin只係失魂投錯票，好彩追加撥款最後以二十五票贊成、十九票反對獲得通過，即係Martin一票並冇影響大局。Martin今次算係小甩轆，有驚無險，如果係喺好似政改表決咁重要嘅關頭甩轆，咁就弊喇！
財委會尋日朝早續會，審議沙中線工程追加撥款。立法會議員蔣麗芸(Ann)發言時就點名提及議員梁耀忠（阿忠），話阿忠講過對呢個議案投反對票嘅議員係為反對而反對，所以就提醒佢唔好投反對票。點知阿Ann呢頭講完，建制派就有人喺表決撥款時投咗反對票，而呢個人正正係班長添！
不過Martin好快就發現自己甩轆誤投反對票，仲要求財委會主席陳健波（波哥）更正為贊成。唔知波哥係咪事出突然一時糊塗，竟然話可以更改紀錄，結果經立法會秘書提醒先改口話會紀錄在案。總而言之，Martin想更正都為時太晚喇！好在建制派尋日人多勢眾，Martin嗰一票並冇影響投票結果，否則否決咗撥款就真係大鑊。
其實過往都有唔少議員試過投票時失誤，好似進出口界議員黃定光去年就試過喺香港教育學院正名為香港教育大學嘅條例草案中錯投反對票。民主派投錯票都有唔少例子，議員劉小麗喺去年討論引用特權法調查廉署高層人事變動係咪同特首梁振英UGL案有關時，亦都意外地只按「出席」按鈕，而未有成功投票，而議員黃碧雲都有投票失誤前科。加上依家民主派喺審議撥款時動輒提出大批臨時議案，建制派否決臨時議案時慣性按反對「按鈕」，到真正表決議案時糊裏糊塗搞錯都唔出奇。
政改指揮出錯 葉國謙成千古罪人
即使議員投錯票，但如果影響唔到投票結果，最多都係畀人取笑，但如果係重要關頭出錯就大件事。二○一五年政改方案，當時身為建制派「班長」嘅前議員葉國謙（阿謙）就因為指揮錯誤，最終令方案喺得八票贊成、廿八票反對下大比數被否決，鬧出國際笑話之餘，亦令佢孭住呢個歷史枷鎖。Martin要引以為鑑，千祈咪重蹈阿謙覆轍喇！