中環出更：梁錦松捲偷步買車 譚志源諗過辭官
前財政司司長梁錦松二○○三年因偷步買車風波辭職，當年擔任梁錦松新聞秘書嘅政制及內地事務局局長譚志源，尋日接受電台訪問回顧政治生涯時話，做官多年最激動係見證香港回歸，最低落就係出任梁錦松新聞秘書時，梁錦松捲入偷步買車醜聞，佢因為冇提醒上司申報利益而備受批評，令佢仕途倒退，當時佢仲曾經考慮過辭職離開政府添！
譚表明唔留任
政府將於七月一日換屆，譚志源已表明唔會留任，佢尋日又提到，特首梁振英唔連任令佢更容易決定去向。事實上，佢喺今年三月底特首選舉後，被問到係咪有意留任下屆政府時，就曾講過自己同候任特首林鄭月娥嘅步伐「有少少唔同」，引起外界猜疑兩人不咬弦。
離開政府在即，譚志源就話，喺過去九年問責官員生涯當中，擔任過三個唔同範疇職位，分別係政制局副局長、特首辦主任及政制局局長，佢希望可更「貼地」感受社會脈搏，亦都想有新突破，可以透過其他工作崗位增廣見聞同服務市民咁話。
卓妮