中環出更：理大時裝展 床褥着上身夠驚喜
天橋上嘅時裝騷，有啲服飾千奇百怪，但時裝達人卻讚不絕口，有時都幾令人費解。卓妮早前喺一個時裝展見到立法會紡織及製衣界議員鍾國斌，佢就一語中的話，如果天橋上啲模特兒着住我哋平日嘅普通出街衫，咁時裝騷仲邊會有人睇？著名時裝設計師馬偉明就話，天馬行空嘅嘢都未必做得到，就算做到仲要做得靚，其實好難，好考技巧。
理工大學紡織及製衣學系早前舉辦時裝展，二十五位應屆畢業生展示合共一百件作品，其中有學生作品取材自日常生活用品如床褥等，大膽又特別。
鍾國斌話自己未試過設計
對於誇張嘅設計，有份擔任評判嘅馬偉明就話，要將一個抽象概念做出嚟並唔容易，佢哋除咗會睇學生意念，仲會睇吓表達手法同效果。好似今次嘅全場總冠軍作品就處理得唔錯。佢仲話顏色嘅運用好反映設計者技巧，因為顏色配搭係需要時間浸淫，相比之下，用晒黑色就冇乜驚喜喇！
經常現身各大時裝展嘅鍾國斌就笑言自己未試過設計，最多都係生產過程中畀少少意見，例如衣領位置等細節。佢話時裝騷啲衫誇張都好正常，係畀設計師發揮創意同展示概念，就算係一線大牌嘅時裝騷，啲衫都會同實際擺喺舖頭賣嘅唔同。
設計師蔡毅明都有到場，佢自言同理大好有淵源，當年做模特兒第一次行騷就係幫一個讀設計嘅朋友手，喺理大時裝展出騷，其後先被發掘。行騷經驗豐富嘅佢，仲將舊有模特兒行嘅Ｔ字高台改為今次嘅Ｕ字平地，追貼新趨勢。
卓妮